Translate

संकीर्तन सरिता - ह. भ. प. यशवंत मधुकर पाटील

                                                 अभंग १ 





राम म्हणता रामचि होईजे  ᛁ पदीं बैसोन पदवी घेईजे ᛁ१
ऐसे सुख वचनी आहे ᛁ विश्वासे अनुभव पाहे ᛁ२
रमरसाचिया चवी ᛁ आन रस रुचती केवीं ᛁ३
तुका म्हणे चाखोनि सांगे ᛁ मज अनुभव आहे अंगे ᛁ४

अर्थ : राम म्हटल्यानंतर तुम्ही राम व्हाल . अर्थात हे पद अंतःकरणात बसले पाहिजे असे या वचनात सुख आहे. मात्र याकरिता विश्वासाची गरज आहे. विश्वास ठेवला तर रामरसाच्या पुढे बाकीचे रस रुचत नाहीत . तुकाराम महाराज म्हणतात मी हे चाखले आहेत ,  मला अनुभव आहे म्हणून तुम्हास सांगतो आहे .

सविस्तर चिंतन :  
         
             जिवाने जर रामनाम घेतले तर तो रामच होईल . राम म्हणजे मर्यादा पुरुषोत्तम आहे . 
१) रामासारखा देव नाही.        
२) रामासारखा राजा नाही. 
३) रामासारखा पुत्र नाही. 
४) रामासारखा पती नाही. 
५) रामासारखा पिता नाही. 
६) रामासारखा बंधू नाही. 
७) रामासारखा मित्र ( सखा ) नाही. 
८) रामासारखा शिष्य नाही. 
९) रामासारखा शत्रू नाही.  

यज्ञ करणे अवघड आहे . दान देणे कठीण आहे . तप करणे सोपे नाही पण राम म्हणणे सर्वात सोपे आहे .